Devlope Lidèchip

Etap 3🇭🇹 — Devlope Lidèchip,Etap Kle Pou Devlope Ayiti

Objektif: Bati lidè vizyonè, konpetan

Pa gen pèp ki ka grandi pi wo pase kalite lidè yo.
Pwoblèm Ayiti pa pwoblèm tè, ni pwoblèm talan—se pwoblèm lidèchip.

Lè lidè yo san vizyon,sa vle di tou pèp la san direksyon.
Lè lidè yo san karaktè, koripsyon vin yon bagay nòmal.

Pou kraze sik ki kende Ayiti pov la, nou dwe leve yon nouvo jenerasyon lidè—lidè ki gen karaktè, ki konnen sa y ap fè, ki detemine pou sèvi olye yo chèche pouvwa.

Ki sa ki fè yon bon lidè?

1. Karaktè an Premye

Konpetans enpòtan, men se karaktè ki kenbe lidèchip.
Nan Karaktè ou jwen’n :

• Onètete

• Disiplin

• Responsablite

• Respè

• Imilite

• Fidelite ak prensip

2. Vizyon

Lidè wè pi lwen pase pwoblèm yo. Yo panse alontèm.
Yo pote yon vizyon pou Ayiti ki pi gwo pase kriz aktyèl la.

3. Kouraj & Kontwòl Tèt Yo

Yon lidè reyèl pa pè responsablite.
Yo kite lòt moun korije yo. Yo renmen bon konsèy. Yo pa kouri lè gen presyon.

Lidèchip vs Pouvwa

An Ayiti, anpil moun konfonn lidèchip ak pouvwa.

Men verite a:

• Lidèchip = Sèvis

• Pouvwa = Kontwòl

Pouvwa san karaktè pwodwi koripsyon.
Lidèchip ak karaktè konstwi yon nasyon.

Gid & Responsablite

Tout gwo lidè nan mond lan gen youn nan twa bagay sa yo:

• Yon moun ki ap gide yo

• Yon moun ki ap korije yo

• Yon moun ki ap kenbe yo nan prensip yo

Sa Ayiti bezwen se:

• Gid pou jèn yo

• Gid pou antreprenè yo

• Fòmasyon pou pastè, pwofesè, enfliyansè

• Pwogram devlopman lidèchip

Sa se wout pou nou fòme lidè ki pap vann peyi a, ki pap pè presyon, e ki pap koube devan koripsyon.

Teste nivo Lidèchip ou Devlope

1. Mande Tèt Ou

• Ki fòs mwen?

• Ki feblès mwen?

• Eske mwen gide moun oswa mwen peze moun?

• Ki jan moun santi yo apre yo pale avè m?

• Eske mwen kenbe pwòp prensip mwen?

• Kisa mwen bezwen amelyore?

2. Men sa pou’w gade kay yon Lidè Ayisyen

Chwazi yon lidè Ayisyen ki reyisi epi etidye:

• Ki Vizyon li?

• Ki Karaktè li?

• Ki Desizyon li pran deja?

• Ki jan li te mennen moun deja?

• 3 leson pou ou ka apran’n de li?

Konklizyon

Si nou vle yon nouvo Ayiti, nou bezwen nouvo lidè.

Nouvel Ayiti a pap sòti:

• nan chans

• nan politik sèlman

• nan slogan

• nan manifestasyon

Li pral sòti nan lidèchip.
Lidèchip ki sèvi.
Lidèchip ki bati.
Lidèchip ki gen karaktè.
Lidèchip ki fòme lòt lidè.

E ou menm — ou rele pou fè pati jenerasyon sa.